raat ke dasht men phaila hua sannaTa huun
apne saa.e se bichhaḌne ki saza paata huun
main kabhi apne liye ghair nahin tha itna
a.ina dekh ke kal raat bahut roya huun
tum se milne ki ḳhushi hai na bichhaḌne ka malal
ḳhud-farebi ke ab is moḌ pe aa pahuncha huun
jab se ik ḳhvab ki ta.abir mili hai mujh ko
main har ik ḳhvab ki ta.abir se ghabrata huun
koi milta hi nahin aankh milane vaala
main tire shahr men suraj ki tarah tanha huun
zindagi ka koi maqsad hi nahin hai ‘azar’
aur main huun ki zarurat ki tarah zinda huun
Leave a Reply