Shaad Aarfi
kabhi talash na zaa.e na ra.egan hogi
agar hui bhi to az-rah-e-imtihan hogi
agar mumaniyat-e-sair-e-gulistan hogi
to phir bahar hamen ru-kash-e-ḳhizan hogi
usuul ye to nahin hai ki na-murad rahen
faza kabhi na kabhi ham pe mehrban hogi
jahan-e-dard men insaniyat ke naate se
koi bayan kare meri dastan hogi
mai-e-nashat-o-tarab jis ka ham se va.ada tha
jabhi hui na faraham to ab kahan hogi
bayan-e-gham to bahut sahl hai pa lazzat-e-gham
siva-e-ijz-e-bayan kis tarah bayan hogi
agar ghalat hai jo kuchh us ne mujh se aa ke kaha
to ye jasarat-e-tahrif-e-razdan hogi
pata chala ki basarat-fareb hain jalve
main is ḳhayal men tha aql pasban hogi
vahan vahan gham-e-halat raushni denge
miri ghazal ki rasa.i jahan jahan hogi
piyo piyo ki subuhi se fasla na rahe
numud-e-sub.h ki taqrib men azaan hogi
nashemanon ki muḳhalif na thi bahar-e-chaman
magar shararat-e-ima-e-baghban hogi
to kya kasafat-e-uryani-e-ghazal ai ‘shad’
adab ki ḳhaak uḌane se kuchh ayaan hogi
Leave a Reply