bhiid hai bar-sar-e-bazar kahin aur chalen
aa mire dil mire gham-khvar kahin aur chalen
koi khidki nahin khulti kisi baghiche men
saans lena bhi hai dushvar kahin aur chalen
tu bhi maghmum hai main bhi huun bahut afsurda
donon is dukh se hain do-char kahin aur chalen
dhundte hain koi sarsabz kushada si faza
vaqt ki dhund ke us paar kahin aur chalen
ye jo phulon se bhara shahr hua karta tha
us ke manzar hain dil-azar kahin aur chalen
aise hangama-e-mahshar men to dam ghutta hai
baten kuchh karni hain is baar kahin aur chalen
Leave a Reply