Aql Jis Pahlu Se Chahe Zist Samjhae Ise

Avinash Pandey

aql jis pahlu se chahe ziist samjha.e ise

dil ka ye aalam ki har lamhe se ḳhauf aa.e ise

dasht ka raahi bhaTak kar aa gaya hai shahar men

qais koi ho to apne saath le jaa.e ise

sar-ba-zanu yaad ka zindani hai baiTha hua

koi miThi yaad aa.e aa ke sahla.e ise

ye hi sab ko dars deta hai qarar-o-sabr ka

ye hi bekal ho uThe to kaun samjha.e ise

bulbul-e-muztar ki qismat jaag jaa.e ek din

chhu ke gul bad-e-saba chhu kar guzar jaa.e ise

ajnabi ek shahar men hai ajnabi logon ke biich

kaun pahchane ise aur le ke ghar jaa.e ise

tum ko gar bimar ki hai fikr kuchh aisa karo

ye baḌi taklif men hai niind aa jaa.e ise

ai junun ab dil ka koi aur maskan DhunD lo

hai pari-chehra koi jo aa ke le jaa.e ise