vo un zulfon ka aalam abtari ka
sabab tha meri shorida-sari ka
pari ki si ho jis zalim ki raftar
vo kya jaane jatan adam-giri ka
ajab apna bhi hai mashuq be-aib
hunar hai jis men ashiq-parvari ka
tiri jadu-nigahi jis ne dekhi
vo kab qaa.il hai sehr-e-samri ka
ravan hain laḳht-e-dil yuun chashm-e-nam se
musafir juun chale rasta tari ka
sharaf as.hab-e-kahf uupar rakhe hai
jo sag hai astan-e-haidari ka
badi mat kar kisi ki ‘muntazir’ tu
agar ḳhvahan hai apni behtari ka
Leave a Reply