ziist be-va.ada-e-anvar-e-sahar hai ki jo thi
zulmat-e-baḳht ba-har-rang-o-nazar hai ki jo thi
ishq barbad-kun-e-rahat-e-dil hai ki jo tha
shoḳhi-e-dost ba-andaz-e-digar hai ki jo thi
aaj bhi koi nahin puchhta ahl-e-dil ko
aaj bhi zillat-e-arbab-e-nazar hai ki jo thi
ḳhud-parasti ka rivaj aaj bhi hai aam ki tha
rasti aaj bhi mohtaj-e-asar hai ki jo thi
aaj bhi jazba-e-iḳhlas pareshan hai ki tha
aaj bhi dida-vari ḳhak-basar hai ki jo thi
aaj bhi ilm-o-hunar ki nahin koi vaq.at
ab bhi na-qadri-e-as.hab-e-hunar hai ki jo thi
aaj bhi mehr-o-vafa ki nahin qimat koi
aaj bhi manzilat-e-kisa-e-zar hai ki jo thi
kamrani pe hai nazan havas-e-hech madar
ashiqi aaj bhi ba-dida-e-tar hai ki jo thi
ruh-e-iḳhlas to dar-band hai be-pursish-e-hal
midhat-e-husn sar-e-rahguzar hai ki jo thi
saf-goi ko samajhte hain yahan aib ab bhi
zehniyat aaj bhi aluda-e-shar hai ki jo thi
asp-e-tazi ko mayassar nahin chara ‘sho.ala’
aur tan-zebi-o-ara.ish-e-ḳhar hai ki jo thi
Leave a Reply