Gham-E-Mohabbat Hai Kar-Farma Dua Se Pahle Asar Se Pahle

Poet

gham-e-mohabbat hai kar-farma dua se pahle asar se pahle

bata rahi hai ye dil ki dhaḌkan vo aa rahe hain ḳhabar se pahle

ye kis ke gesu se maang laa.i nasim nik.hat sahar se pahle

faza-e-gulshan udaas si thi shamim-e-ambar-asar se pahle

baja.e ḳhuun mai jhalak rahi hai hamari rag rag se ab to saaqi

bahut hi be-kaif zindagi thi ḳhumar-agin nazar se pahle

nazar nazar aks ru-e-janan nafas nafas be-ḳhudi ka aalam

hijab yuun darmiyan se uTTha nazar mili yuun nazar se pahle

ghurur viraniyon pe apni abas bayaban ko is qadar hai

rivaj paaya hai ye tariqa haqiqatan mere ghar se pahle

ye ahl-e-vahshat ka hausla hai ḳhizan pe qabza hai fasl-e-gul ka

vo baḌh ke sina-sipar hue hain guman-e-barq-o-sharar se pahle

nuqush-e-sajda pe aaj mere vo naqsh-e-pa sabt kar rahe hain

mire muqaddar ki yavari ka ye naqsh uTTha kidhar se pahle

kabhi tasavvur men aa.e bhi to ghaneri zulfon ko ruḳh pe Daale

hamari qismat men sham-e-gham thi numud-e-nur-e-sahar se pahle

jahan ki ranginiyon se ab tak ‘vaqar’ bilkul hi be-ḳhabar the

asir-e-jalva nazar thi apni shu.ur-e-zauq-e-nazar se pahle