har roz hi imroz ko farda na karoge
va.ada ye karo phir kabhi va.ada na karoge
ye maan liya ahd-e-vafa bhuul chuke ho
kya bhuul ke bhi tum hamen chaha na karoge
mahfil se hi uTh ja.enge ham aise qaba-chak
vahshat ka hamari kabhi shikva na karoge
achchha tha ki jab ariza-e-hijr nahin tha
achchha hai ki ab tum kabhi achchha na karoge
jis raaz men shamil hai hamara bhi fasana
us raaz ko kya ham pe bhi ifsha na karoge
mar ja.ega dil hasrat-e-anvar-e-sahar men
be-parda agar tum ruḳh-e-zeba na karoge
kya aur na tha tark-e-ta.alluq ka bahana
sunte hain ki ab tum hamen rusva na karoge
samjho to ‘zahir’ un ki nigahon ke ishare
kya aaj bhi iz.har-e-tamanna na karoge
Leave a Reply