Sardar Saleem
vahm jaisi shukuk jaisi chiiz
umr hai bhul-chuk jaisi chiiz
kaise rakkhen zamir ko mahfuz
peT men le ke bhuuk jaisi chiiz
ghol di hai ghazal ke lahje men
main ne koyal ki kuuk jaisi chiiz
dard ban kar tiri juda.i ka
dil men uThti hai huuk jaisi chiiz
kaash hoti hasin logon men
koi husn-e-suluk jaisi chiiz
maslahat ki bina pe log ‘salim’
chaaT lete hain thuuk jaisi chiiz
Leave a Reply