aane vaale hadson ke ḳhauf se sahme hue
log phirte hain ki jaise ḳhvab hon TuuTe hue
sub.h dekha to na tha kuchh paas uljhan ke siva
raat ham baiThe rahe kis soch men Duube hue
apne dukh men Duub kar vus.at mili kaisi hamin
hain zamin se asman tak ham hi ham phaile hue
aaj a.ine men ḳhud ko dekh kar yaad aa gaya
ek muddat ho ga.i jis shaḳhs ko dekhe hue
jism ki divar gir jaa.e to kuchh ehsas ho
apne andar ham paḌe hain kis qadar simTe hue
kis se puchhen rat-bhar apne bhaTakne ka sabab
sab yahan milte hain jaise niind men jaage hue
is nagar ke jagmagate raston par ghuum kar
ham chale aa.e ghamon ki dhuul men lipTe hue
jin ko ai ‘azad’ baḳhshi thi mahak ham ne kabhi
ab vahi raste hamare vaste kanTe hue
Leave a Reply