jo kuchh bhi aap kahte hain vo Thiik hi to hai
taskin-e-arzu ki talab bhiik hi to hai
jab chhin li ga.i miri ankhon se raushni
duniya miri nigah men tarik hi to hai
fasl-e-ḳhizan buri sahi itni buri nahin
ye amad-e-bahar ki tahrik hi to hai
ghabra raha hai dil to ta.ajjub ki baat kya
manzil shu.ur-e-dard ki nazdik hi to hai
ishq-o-havas men farq na karna kabhi kabhi
jazbat-e-dil ki doston taz.hik hi to hai
apna samajh ke main ne sunaya tha hal-e-dil
tum ne bhi saath chhoḌ diya Thiik hi to hai
is rabt-e-na-tamam se kuchh fa.eda na tha
‘nayyar’ kahani ḳhatm hui Thiik hi to hai
Leave a Reply