Ajib Rut Hai Ye Hijr-O-Visal Se Aage

ajiib rut hai ye hijr-o-visal se aage

kamal hone laga hai kamal se aage

vo ek lamha jo titli sa apne beach men hai

use main le ke chali mah-o-sal se aage

koi javaz ho hamdam ab is rifaqat ka

talash kar mujhe mere jamal se aage

javab-e-khvab bhala khvab ke siva kya hai

magar vo nikla nahin hai saval se aage

pighal raha hai mira din siyah raton men

kahani ghuum rahi hai zaval se aage

ruke hue hain kinare pe vo talatum hai

ye shahr-e-ishq hai aur hai majal se aage

masham-e-jan men koi diip sa jalae hue

nikal chali huun main ranj-o-malal se aage

Leave a Comment