poet

Khaali Sharab-E-Ishq Se Saghar Kabhi Na The

khali sharab-e-ishq se saghar kabhi na the

aise to khushk dal ke samundar kabhi na the

jo sang-e-ehtisab yaganon ke paas hain

dushman ke haath men bhi vo patthar kabhi na the

kis samt ja rahe hain unhen khud pata nahin

yuun be-khabar to raah se rahbar kabhi na the

dil tukde tukde ho gaya zakhmi hai ruuh bhi

itne to tez vaqt ke nashtar kabhi na the

milta nahin kahin bhi dar-o-bam ka nishan

ham ghar men rah ke itne to be-ghar kabhi na the

kya janen kya huiin vo hasin shokhiyan ‘hayat’

aise niDhal phuul se paikar kabhi na the

More Poems

Leave a Comment