Bas Ki Chun Badr-Zamana Ye Ghatata Hai Mujhe

bas ki chuun badr-zamana ye ghatata hai mujhe

din-ba-din aur hi aalam nazar aata hai mujhe

husn nairangi-e-alam ka ajab rang se kuchh

ain nairangi men sau rang dikhata hai mujhe

itna maalum to hota hai ki jaata huun kahin

koi hai mujh men ki mujh se liye jaata hai mujhe

yaad main kis ki karun mujh ko kahan hosh-o-havas

apni hi yaad se ye ishq bhulata hai mujhe

turfa aalam hai ki har ek se vo maya-naz

aap rahta hai alag aur bhidata hai mujhe

chhod kar mujh ko vo tanha koi jaata hai kahin

ye bhi ik chhed hai us ko ki kudhata hai mujhe

mujh ko kyuun khinche liye jaae hai taqsir miri

umr tuk rah to sahi kaun bulata hai mujhe

mujh men aur dil men sada hai sabaq-e-ishq ka dars

main sunata huun use aur vo sunata hai mujhe

mere nakhunon men main tujh se kiye chaar abru

apni kya tegh se har dam tu Darata hai mujhe

tair-e-rang-e-hina huun to lagun tere haath

chutkiyon men tu abas yaar udata hai mujhe

tujh ko manzur jafa mujh ko hai matlub vafa

na ye bhata hai tujhe aur na vo bhata hai mujhe

jo miri chidh hai usi baat ka hai tujh ko zauq

aah tu dida-o-danista khujata hai mujhe

phir phir aine men munh dekhne lagta hai ‘hasan’

ek dam aap men vo shokh jo paata hai mujhe

Leave a Comment