Sikandar Ali Wajd
hasin yadon se ḳhalvat anjuman hai
ḳhamoshi naghma-zar-e-sad-suḳhan hai
nigar-e-gul-badan gul-pairahan hai
dhanak raqsan chaman-andar-chaman hai
miri divangi par hansne vaalo
yahan farzangi divana-pan hai
mubarak rah-rav-e-rah-e-tamanna
vatan ghurbat men hai ghurbat vatan hai
Dara sakte nahin ḳhunin andhere
nigah-e-be-dilan zulmat-shikan hai
ḳhushi arzan hai bazar-e-jahan men
baha-e-gham mata-e-jan-o-tan hai
azal se ‘vajd’ har qatre ke dil men
qayamat-ḳhez tufan maujzan hai
Leave a Reply