Poet
ek yusuf ke ḳharidar hue hain ham log
phir mohabbat men giraftar hue hain ham log
chashm-e-rangin ki karamat se ghayal ho kar
teri ulfat ke talabgar hue hain ham log
shahr-e-ḳhuban ki rivayat se shorish kar ke
gham-e-hijran ke saza-var hue hain ham log
zindagi tu ne hamen dard ke aansu baḳhshe
phir bhi tere hi taraf-dar hue hain ham log
sub.h-e-alam ka chehra nahin dekha jaata
ḳhvab-e-ḳhush-rang se bedar hue hain ham log
manzil-e-ishq bhi ham ko hi mili hai ‘asif’
dasht-o-sahra men agar ḳhvar hue hain ham log
Leave a Reply