Khursheed Akbar
dariya men bahut kuchh hai ravani ke alava
muddat se main sairab huun paani ke alava
ai shahr-e-sitam-zad tiri umr baḌi ho
kuchh aur bata naql-e-makani ke alava
iman-shikan paikar-e-doshiza-e-alam
sab kuchh hai tire paas javani ke alava
kis ahd-e-gunahgar ne li aḳhiri hichki
masruf hain sab fatiha-ḳhvani ke alava
rangon ko baratne ka hunar siikh chuka huun
kya chahiye ab teri nishani ke alava
duniya se ta.alluq ka sabab kis ko bata.un
ab dost kahan dushman-e-jani ke alava
kya duun tujhe jaati hui jan-baz baharo
kuchh paas nahin barg-e-ḳhizani ke alava
har shaḳhs mudava hai aqidat se hai be-zar
mohlat hai kise pir-e-mughani ke alava
ash.ar kahan dete hain munh dekhi gavahi
‘ḳhurshid’ kahan nur-e-ma.ani ke alava
Leave a Reply