aur kya zindagi rah ga.i
ik musalsal kami rah ga.i
vaqt phir darmiyan aa gaya
baat phir an-kahi rah ga.i
paas jangal koi jal gaya
raakh har-su jami rah ga.i
zar ka indhan bani fikr-e-nau
sha.iri adh-mari rah ga.i
main na roya na khul kar hansa
har nafas tishnagi rah ga.i
tum na aa.e miri zindagi
raah takti hui rah ga.i
paas dariya-dili rakh liya
laakh tishna-labi rah ga.i
phir fana ka payam aa gaya
ek ummid thi rah ga.i
aap ‘ahmad’ kahan rah ga.e
aur kahan zindagi rah ga.i
Leave a Reply