Shahzad Ahmad
shahr ka shahr agar aa.e bhi samjhane ko
is se kya farq paḌega tire divane ko
kya koi khel hai benam-o-nishan ho jaana
vaise to sham.a bhi tayyar hai jal jaane ko
vo ajab shaḳhs tha kal jis se mulaqat hui
main mila huun kisi jaane hue anjane ko
ek lamha bhi to bekar nahin kaT sakta
ek gutthi jo mili hai mujhe suljhane ko
ye alag baat ki ik buund muqaddar men na thi
sar pe sau baar ghaTa chha.i rahi chhane ko
shaam hone ko hai jalne ko hai sham-e-mahfil
saans lene ki bhi fursat nahin parvane ko
Leave a Reply