Shab-E-Ahd-E-Gul Mein Baqi Hain Abhi Ranaiyan

shab-e-ahd-e-gul meñ baaqī haiñ abhī ra.anā.iyāñ

tairtī haiñ ġham kī gahrā.ī meñ kuchh parchhā.iyāñ

der tak tanhā khaḌā dekhā kiyā us moḌ par

jā chukī thiiñ jis taraf bajtī huī shahnā.iyāñ

saḳhtī-e-daur-e-ḳhizāñ ko chaar din biite nahīñ

phir vahī bulbul ke naġhme phir chaman-ārā.iyāñ

ḳhud se bhī ḳhalvat meñ milne ko taras jaatā huuñ maiñ

lipTī rahtī haiñ hamesha yuuñ mirī parchhā.iyāñ

‘nūr’ be-pāyāñ ḳhalā meñ Dūbtī hai jab nazar

aur baḌh jaatī haiñ merī raat kī tanhā.iyāñ

Leave a Comment