Tu Bhi Kar Ghaur Is Kahani Par

tū bhī kar ġhaur is kahānī par

jo likhī jā rahī hai paanī par

ye zamīñ zar ugā.egī ik din

rakh yaqīñ apnī kalba-rānī par

us kī be-mehvarī pe ġhaur na kar

rahm khā us kī be-zabānī par

garche mushkil talāsh thī us kī

ghar tirā mil gayā nishānī par

un se ma.anī kashīd kar apne

naqsh ubhre haiñ jo bhī paanī par

qaa.em ‘anvar-sadīd’ ne rakkhā

irtikāz apnī zindagānī par

Leave a Comment