mere hathon men kuchh gulab to hain
jo na mumkin rahe vo ḳhvab to hain
rang bikhre hain char-su mere
reg-zaron men kuchh sarab to hain
teri chahat ki aarzu na sahi
ham tire saya-e-itab to hain
lafz Dhalne lage hain ma.ani men
zindagi se mile javab to hain
raushni si rahi daraḳhton par
jangalon par rahe shabab to hain
raat ke manzar-e-ḳhamoshi men
chhiḌ ga.e naghma-e-rabab to hain
is zamane ki kya haqiqat hai
sahil-e-vaqt par habab to hain
Leave a Reply