bach kar kahan main un ki nazar se nikal gaya
ik tiir tha ki saaf jigar se nikal gaya
khud raftagi hi chashm-e-haqiqat jo va hui
darvaza khul gaya to main ghar se nikal gaya
mahv-e-jamal rah gae ham kuchh khabar nahin
aaya kidhar se yaar kidhar se nikal gaya
kaisa hava hua mire rone ko dekh kar
daman-e-abr dida-e-tar se nikal gaya
rone se hijr-e-yar men taskin ho gai
dil ka bukhar dida-e-tar se nikal gaya
akhir kiya akhir-e-shab-e-vasl ne mujhe
dam pahli bang-e-murgh-e-sahar se nikal gaya
aahon ne mujh ko atish-e-gham se najat di
manind-e-dud nar-e-saqar se nikal gaya
dikhlaya na-tavani ne ghar yaar ka mujhe
misl-e-nigah rauzan-e-dar se nikal gaya
saaqi ki chashm-e-mast ne aise dhuen udaae
shoala sa ek atish-e-tar se nikal gaya
joban se dhal chali hain kahan ab latak ki chaal
vo pech un ke mu-e-kamar se nikal gaya
us gul ke dagh-e-ishq ne aisa kiya gudaz
ghul ghul ke maghz shama ke sar se nikal gaya
mushkil hai ai ‘saba’ pa karo jabr ikhtiyar
hai khair dil jo ishq ke shar se nikal gaya