Rahman Hafeez
agar aadmi vaqt ka raaz pa le
to mumkin hai lamha bhi sadiyon ko ja le
main alfaz ki kunjiyan Dhalta huun
khulenge kisi roz abjad ke taale
guzarta hua vaqt ruk sa gaya hai
parinde hain do chonch men chonch Daale
zamin ki kamar to hai pahle se kuuza
vahi bojh rakhiyo jise ye uTha le
ye hijrat bhi jaise abas ki ga.i ho
yahan bhi vahi log hain dekhe bhale
yaqin chhup ga.e hain gumanon ke pichhe
guman kah rahe hain hamen aazma le
hamesha nahin rahta dil kar-amad
abhi vaqt hai to ye sikka chala le
safar ki basharat mili dil pukara
ye ghar mera gulshan ḳhuda ke havale
Leave a Reply