Ghulam Rabbani Taban
lutf ye hai jise ashob-e-jahan kahta huun
usi zalim ko farogh-e-dil-o-jan kahta huun
ghair ka zikr hi kya muft men ilzam na do
dil ki har baat main tum se bhi kahan kahta huun
kisi majbur ke honTon pe jo aa jaata hai
us tabassum ko main e.ajaz-e-fughan kahta huun
na main zindani-e-sahra na asir-e-gulshan
koi bandish ho use ji ka ziyan kahta huun
dil shikasta sahi mayus nahin huun ai dost
main ki har daur ko daur-e-guzaran kahta huun
husn ka sheva-e-paiman-shikani achchha hai
phir bhi har saans ko chashm-e-nigaran kahta huun
koi had hai miri ashufta-sari ki ‘taban’
un ki zulfon ko charaghon ka dhuan kahta huun
Leave a Reply