Shahzad Ahmad
is bhare shahr men aram main kaise pa.un
jagte chiḳhte rangon ko kahan le ja.un
pairahan chust hava sust khaḌi divaren
use chahun use rokun ki juda ho ja.un
husn bazar ki zinat hai magar hai to sahi
ghar se nikla huun to us chauk se bhi ho aa.uun
laḌkiyan kaun se goshe men ziyada hongi
na karun baat magar peḌ to ginta ja.un
kar raha huun jise badnam gali-kuchon men
aankh bhi us se milate hue main ghara.un
vo mujhe pyaar se dekhe bhi to phir kya hoga
mujh men itni bhi sakat kab hai ki dhoka kha.un
husn ḳhud ek bhikari hai mujhe kya dega
kis tavaqqo.a pe main daman-e-nazar phaila.un
vaqi.a kuchh bhi ho sach kahne men rusva.i hai
kyuun na ḳhamosh rahun ahl-e-nazar kahla.un
ek muddat se ka.i saa.e miri taak men hain
kab talak raat ki divar se sar Takra.un
admiyat hai ki hai gumbad-e-be-dar koi
DhunDne niklun to apna bhi na rasta pa.un
liye phirta huun ḳhayalon ka dahakta dozaḳh
sar se ye bojh utarun to ḳhuda ho ja.un
Leave a Reply