Habib Jalib
ye soch kar na ma.il-e-fariyad ham hue
abad kab hue the ki barbad ham hue
hota hai shad-kam yahan kaun ba-zamir
nashad ham hue to bahut shaad ham hue
parvez ke jalal se Takra.e ham bhi hain
ye aur baat hai ki na farhad ham hue
kuchh aaise bha ga.e hamen duniya ke dard-o-gham
ku-e-butan men bhuli hui yaad ham hue
‘jalib’ tamam umr hamen ye guman raha
us zulf ke ḳhayal se azad ham hue
Leave a Reply