ḳhatm raton-rat us gul ki kahani ho ga.i
rang bosida hue ḳhushbu purani ho ga.i
jis se raushan tha muqaddar vo sitara kho gaya
zulmaton ki nazr aḳhir zindagani ho ga.i
kal ujalon ke nagar men hadsa aisa hua
chaḌhte suraj par diye ki hukmarani ho ga.i
rah ga.i thi la.al banne men kami ik aanch ki
aankh se gir kar lahu ki buund paani ho ga.i
chilla-e-jan par chaḌha kar aḳhiri sanson ke tiir
maut ki sarhad men daḳhil zindagani ho ga.i
ḳhauf ab aata nahin hai sipiyan chunte hue
dosti apni samundar se purani ho ga.i
kis jagah aaya hai tu a.ankhon ke nilam bhuul kar
gham kahan iqbal-‘sajid’ ki nishani ho ga.i
Leave a Reply