goshe badal badal ke har ik raat kaaT di
kachche makan men ab ke bhi barsat kaaT di
vo sar bhi kaaT deta to hota na kuchh malal
afsos ye hai us ne miri baat kaaT di
dil bhi lahuluhan hai ankhen bhi hain udaas
shayad ana ne shah-rag-e-jazbat kaaT di
jab bhi hamen charagh mayassar na aa saka
suraj ke zikr se shab-e-zulmat kaaT di
jadugari ka khel adhura hi rah gaya
darvesh ne shabih-e-tilismat kaaT di
halanki ham mile the baḌi muddaton ke ba.ad
auqat ki kami ne mulaqat kaaT di
ThanDi hava.en mahki faza narm chandni
shab to bas ek thi jo tire saat kaaT di
Leave a Reply