Poet
dam-e-nim-shab kul faza so rahi hai
ḳhiraman ḳhiraman hava so rahi hai
shikasta sitaron ko niind aa rahi hai
hazin TimTimati ziya so rahi hai
mukammal ḳhamoshi hai har raqs-gah men
lab-e-chang-o-nai par nava so rahi hai
zamin se falak tak falak se zamin tak
ba-rang-e-taḳhayyul dua so rahi hai
na jaane kahan ishq susta raha hai
kahan zindagi ki ada so rahi hai
koi ruup dil men mire so raha hai
kanval men qamar ki ziya so rahi hai
ḳhuda ke liye tu bhi ab so ja ‘az.har’
siva tere ḳhalq-e-ḳhuda so rahi hai
Leave a Reply