Adeeb Suhail
jab se hai bad-e-khizan sarsar-e-gham avara
khushk patton ki tarah rahte hain ham avara
kuchh to hai baat ki hai mausam-e-gul ke ba-vasf
bu-e-gul bu-e-saba bu-e-sanam avara
kunj-dar-kunj sitam-khurda ghazalon ko abhi
ta-ba-kai rakkhegi ye lazzat-e-ram avara
hajla-e-sang-e-sar-e-rah men na jaane kitne
ru-numai ko hain betab sanam avara
hai gham-e-zist ka ya soz-e-mohabbat ka sila
ariz-e-gul pe jo hai gauhar-e-nam avara
rang-e-ariz ko tamazat se bachane ke liye
rukh pe lahraya hua abr-e-karam avara
Leave a Reply