meri sham-e-anjuman men gul hai gul men khaak hai
daagh siine ke chaman men gul hai gul men khaak hai
dagh-e-dil ko khaksaron ke lagaya tu ne munh
ghuncha-e-tang-e-dahan men gul hai gul men khaak hai
baad har din daagh hai teri kudurat ka mujhe
sahn-e-daman-e-kafan men gul hai gul men khaak hai
ya mukaddar ho ke duuba hai mira dil ai pari
ya teri chah-e-zaqan men gul hai gul men khaak hai
gard-e-ghurbat se bhari hai mere maskan ki bahar
daman-e-subh-e-vatan men gul hai gul men khaak hai
daghdaron ne kudurat se buna un ka palang
sumbul-e-mauj-e-rasan men gul hai gul men khaak hai
vahshi-e-gesu ne dagha haath udaae gard-e-gham
shakh-e-ahu-e-khutan men gul hai gul men khaak hai
daagh chhalle ka sarape men kudurat-za hua
gul-rukhon nakhl-e-badan men gul hai gul men khaak hai
ban gaya hai shisha-e-saat magar fanus-e-shama
aks shoale ka lagan men gul hai gul men khaak hai
sagaron ki phuul piine se hui mitti kharab
jam-e-mai bagh-e-sukhan men gul hai gul men khaak hai
gard-e-zulmat daali laale par khizan ne ai falak
chand ke badle gahan men gul hai gul men khaak hai
balon men chhup kar kiran phuul un ka mitti ho gaya
afai-e-gesu ke phan men gul hai gul men khaak hai
daagh de kar malte hain ye shama-ru mitti ka itr
rakht-e-ahl-e-anjuman men gul hai gul men khaak hai
unsur-e-khaki hua barbad ahl-e-dagh ka
in dinon vahshat ke ban men gul hai gul men khaak hai
zakhm-e-sar par dalta huun un buton ki gard-e-rah
ab kulah-e-barahman men gul hai gul men khaak hai
phuul pi pi kar mukaddar ho raha hai vo sabih
dekh lo nakhl-e-saman men gul hai gul men khaak hai
hai mukaddar nur-e-mehr us rashk-e-gul ke hijr men
gulshan-e-charkh-e-kuhan men gul hai gul men khaak hai
mere dil men daagh hai har daagh men hai gard-e-gham
andalibo is chaman men gul hai gul men khaak hai
parde men hai phuul sa munh aur munh pe gard-e-khat
is sahar ke pairahan men gul hai gul men khaak hai
mathe par hai dagh-e-sajda daagh men gard-e-sujud
khatt-e-qismat ki shikan men gul hai gul men khaak hai
gard-e-kulfat laae hai fasl-e-bahari apne saath
shakh-e-har-nakhl-e-chaman men gul hai gul men khaak hai
kya kahun is misra-e-farmaishi men ai ‘munir’
hai hiran gul men hiran men gul hai gul men khaak hai
Leave a Reply