ḳhirad ki zad men agar gulsitan bhi aata hai
yaqin-e-alam-e-vahm-e-guman bhi aata hai
gavah ghuncha-o-gul hain bahar ka mausam
mire chaman men ba-rang-e-ḳhizan bhi aata hai
tire huzur hai goya mire labon ka sukut
nigah-e-ishq ko husn-e-bayan bhi aata hai
mire sulagne ka ahval sunne valon ko
jo uTh raha hai nazar vo dhuan bhi aata hai
nigah paḌti hai jab zaḳhm-ha-e-dil pe mujhe
ḳhayal-e-mehr-o-mah-o-kahkashan bhi aata hai
nuqush-e-sajda usi raah ka muqaddar hain
vo raah jis men tira astan bhi aata hai
main naam bhuul raha huun magar koi ‘nashtar’
mujhe sunane miri dastan bhi aata hai
Leave a Reply