Tum Kya Sahab Aur Tumhaari Baat Hai Kya

tum kyā sāhab aur tumhārī baat hai kyā

dhartī kī ākāsh tale auqāt hai kyā

sirf junūñ hai us ke sivā ye kuchh bhī nahīñ

pyaar na dekhe nasl hai kaisī zaat hai kyā

pūchh rahī haiñ ruuTh ke jaatī ḳhushiyāñ bhī

jiit se pahle jīvan path par maat hai kyā

ham kyā jāneñ ham ne añdherā oḌh liyā

is kī adā kyā ḳhvāhish kyā jazbāt hai kyā

baḳht kā taara shaam se pahle Duub gayā

raat ga.e ab tāroñ kī bārāt hai kyā

tere saare ḳhvāb hī ‘zākir’ bhiig chuke

dil kī zamīñ par ashkoñ kī barsāt hai kyā

Leave a Comment