Poet
ab ke jo yahan se ja.enge ham
phir tujh ko na munh dikha.enge ham
mushkil hai na aana tujh gali men
par ye bhi sahi na a.enge ham
jo aage kaha kiye hain tujh se
so ab ke vo kar dikha.enge ham
aisa hi jo dil na rah sakega
Tuk duur se dekh ja.enge ham
haan kyuun na milenge tujh se zalim
jab galiyen nit ki kha.enge ham
azurda ho ghair se laḌo yaan
is ohde se kab bar a.enge ham
jiine hi se haath uTha.enge lek
baten na tiri uTha.enge ham
gar ziist hai tujh talak to phir kya
sadqe tire mar hi ja.enge ham
ab kuche men tere hi pyare
kisi aur se ji laga.enge ham
juun chahiye chaah ka sarishta
jiite hain to kar dikha.enge ham
is par bhi agar milenge ḳhair
‘qa.em’ hi na phir kaha.enge ham
Leave a Reply