ghuTan azab-e-badan ki na meri jaan men la
badal ke ghar mira mujh ko mire makan men la
miri ikaai ko iz.har ka vasila de
miri nazar ko mire dil ko imtihan men la
saḳhi hai vo to saḳhavat ki laaj rakh lega
saval arz-e-talab ka na darmiyan men la
dil-e-vajud ko jo chiir kar guzar jaae
ik aisa tiir tu apni kaḌi kaman men la
hai vo to hadd-e-giraft-e-ḳhayal se bhi pare
ye soch kar hi ḳhayal us ka apne dhyan men la
badan tamam usi ki sada se guunj uThe
talatum aisa koi aaj meri jaan men la
charagh-e-rahguzar laakh tabnak sahi
jala ke apna diya raushni makan men la
ba-rang-e-ḳhvab sahi saari kaenat ‘akbar’
vajud-e-kul ko na andesha-e-guman men la
Leave a Reply