jhunjhlae hain lajae hain phir muskurae hain
kis ehtimam se unhen ham yaad aae hain
dair-o-haram ke habs-kadon ke satae hain
ham aaj mai-kade ki hava khane aae hain
ab ja ke aah karne ke adab aae hain
duniya samajh rahi hai ki ham muskurae hain
guzre hain mai-kade se jo tauba ke baad ham
kuchh duur adatan bhi qadam ladkhadae hain
ai josh-e-girya dekh na karna ḳhajil mujhe
ankhen miri zarur hain aansu parae hain
ai maut ai bahisht-e-sukun aa ḳhush-amdid
ham zindagi men pahle pahal muskurae hain
jitni bhi mai-kade men hai saaqi pila de aaj
ham tishna-kam zohd ke sahra se aae hain
insan jite-ji karen tauba ḳhataon se
majburiyon ne kitne farishte banae hain
samjhate qabl-e-ishq to mumkin tha banti baat
naseh gharib ab hamen samjhane aae hain
kaabe men ḳhairiyat to hai sab hazrat-e-‘ḳhumar’
ye dair hai janab yahan kaise aae hain