Shaista Mufti
ajnabi shahr men ulfat ki nazar ko tarse
shaam dhal jaae to rah-gir bhi ghar ko tarse
khali jholi liye phirta hai jo aivanon men
mera shaffaf hunar arz-e-hunar ko tarse
jis jagah ham ne jalae the vafaon ke diye
phir usi gaah pe dildar nazar ko tarse
meri be-khvab nigahen hain samundar shab hai
vaqt tham tham ke jo guzre hai sahar ko tarse
jaane ham kis se mukhatab hain bhari mahfil men
baat dil men jo na utre hai asar ko tarse
kitne mausam hain ki chup-chap guzar jaate hain
tere aane ka dilasa hai khabar ko tarse
shabnami raakh bichhi hai mire armanon ki
naqsh-e-pa tere kisi khak-basar ko tarse
Leave a Reply