a.ina ban ja.iye jalva-asar ho ja.iye
samne vo hon to sar-ta-pa nazar ho ja.iye
soz-e-dil se gosha-e-tanha.i men kya fa.eda
is tarah jaliye charagh-e-rahguzar ho ja.iye
is udasi ka dhundlaka ḳhatm ho shayad kabhi
shaam se pahle hi unvan-e-sahar ho ja.iye
manzil-e-ulfat pe dil tanha pahunch sakta nahin
aap agar chahen to mere ham-safar ho ja.iye
ḳhud-baḳhud saare zamane ko ḳhabar ho ja.egi
hoshiyari hai ki sab se be-ḳhabar ho ja.iye
shauq kahta hai ki sajdon men tasalsul chahiye
dil ye kahta hai ki jazb-e-sang-e-dar ho ja.iye
jab kisi se pesh-qadmi zulm ki rukti na ho
us jagah lazim hai ḳhud sina-sipar ho ja.iye
ik azab-e-mustaqil hai fikr-e-ta.amir-e-makan
sakin-e-sahra-e-be-divar-o-dar ho ja.iye
kashmakash men infiradiyyat zaruri hai ‘saba’
jis taraf koi nahin hota udhar ho ja.iye
Leave a Reply