Rakesh Dilbar
chalte chalte raah men aisa bhi kar jaate hain ham
manzil-e-maqsud se aage guzar jaate hain ham
yakja kar paata hai vo ham ko ka.i ghanTon ke ba.ad
lams se us ke jo pal bhar men bikhar jaate hain ham
ek jumla hi qaza ka apni baa.is ban gaya
lab pe bas zer-o-zabar aate hi mar jaate hain ham
ḳhubsurat is liye lagti hai tasvir-e-ghazal
muḳhtalif lahjon se is men rang bhar jaate hain ham
dil sada deta hai jab avargi avargi
ja ke phir us ke mahalle men Thahar jaate hain ham
rahguzar se vo miTa deta hai qadmon ke nishan
manzilon pe naqsh-e-pa ban kar ubhar jaate hain ham
ek charagar to aisa bhi hai ‘dilbar’ shahr men
jis ke hathon ki dava khate hi mar jaate hain ham
Leave a Reply