asrarul-haq-majaz

Sarmaya-Dari

kaleja phunk raha hai aur zaban kahne se aari hai

bataun kya tumhen kya chiiz ye sarmaya-dari hai

ye vo andhi hai jis ki rau men muflis ka nasheman hai

ye vo bijli hai jis ki zad men har dahqan ka khirman hai

ye apne haath men tahzib ka fanus leti hai

magar mazdur ke tan se lahu tak chuus leti hai

ye insani bala khud khun-e-insani ki gahak hai

vaba se badh ke mohlik maut se badh kar bhayanak hai

na dekhe hain bure is ne na parkhe hain bhale is ne

shikanjon men jakad kar ghunt Daale hain gale is ne

bala-e-be-aman hai taur hi is ke nirale hain

ki is ne ghaiz men ujde hue ghar phunk Daale hain

qayamat is ke ghamze jan-leva hain sitam is ke

hamesha sina-e-muflis pe padte hain qadam is ke

kahin ye khuun se fard-e-mal-o-zar tahrir karti hai

kahin ye haDDiyan chun kar mahal taamir karti hai

gharibon ka muqaddas khuun pi pi kar bahakti hai

mahal men nachti hai raqs-gahon men thirakti hai

ba-zahir chand firaunon ka daman bhar diya is ne

magar gul-bagh-e-alam ko jahannam kar diya is ne

darinde sar jhuka dete hain loha maan kar is ka

nazar saffak-tar is ki nafas makruh-tar is ka

jidhar chalti hai barbadi ke saman saath chalte hain

nahusat ham-safar hoti hai shaitan saath chalte hain

ye akasr luut kar maasum insanon ko rahon men

khuda ke zamzame gaati hai chhup kar khanqahon men

ye Daain hai bhari godon se bachche chhin leti hai

ye ghairat chhin leti hai hamiyyat chhin leti hai

ye insanon se insanon ki fitrat chhin leti hai

ye ashob-e-halakat fitna-e-iskandar-o-dara

zamin ke devtaon ki kaniz-e-anjuman-ara

hamesha khuun pi kar haDDiyon ke rath men chalti hai

zamana chikh uthta hai ye jab pahlu badalti hai

garajti gunjti ye aaj bhi maidan men aati hai

magar bad-mast hai har har qadam par ladkhadati hai

mubarak dosto labrez hai ab is ka paimana

uthao andhiyan kamzor hai buniyad-e-kashana

More Poems

Leave a Comment