ḳhvab sunne se ga.e ishq batane se ga.e
zindagi ham tiri tauqir baḌhane se ga.e
ghar ke angan men laga peḌ kaTa hai jab se
ham tiri baat parindon ko sunane se ga.e
juz tujhe dekhne ke aur nahin tha koi kaam
ye alag baat kisi aur bahane se ga.e
jab se vahshat ne na.i shakl nikali apni
ham junun-zad kisi dasht men jaane se ga.e
vaqt par us ne pahunchne ka kahlvaya tha
ham hi taḳhir se pahunche so Thikane se ga.e
asman roz mire ḳhvab men aa jaata hai
ham ḳhayalon men hasin chand banane se ga.e
dil ki tanha.i men vahshat ki daraḌen hain ‘sa.id’
ham daraḌon men tira hijr basane se ga.e
Leave a Reply