Nazeer Siddiqui
kisi dil men mere liye pyaar kyuun ho
ye isar hai aur isar kyuun ho
tabahi ho jab aarzu ka muqaddar
to dil is tabahi se hushiyar kyuun ho
ye ḳhuddar hona hi laaya ḳharabi
mohabbat men insan ḳhuddar kyuun ho
koi apne hi gham se ḳhali kahan hai
jahan men koi mera gham-ḳhvar kyuun ho
na pahla sa milna na aana na jaana
ab itne bhi tum mujh se bezar kyuun ho
isi kashmakash ne Duboya jahan ko
unhen jiit kyuun ho mujhe haar kyuun ho
jafa par nahin jab vo dil hi men nadim
nazar se nadamat ka iz.har kyuun ho
agar baḳhsh dene pe tayyar ho tum
mujhe jurm se apne inkar kyuun ho
Leave a Reply