be-samt ye safar hai zara dekh kar chalo
anjan rahguzar hai zara dekh kar chalo
guzra idhar se jo bhi vo patthar men Dhal gaya
jaadu ka ye nagar hai zara dekh kar chalo
patthar pighal rahe hain tamazat se dhuup ki
ye dasht-e-be-shajar hai zara dekh kar chalo
karne lage hain raqs bagule havaon men
tufan tez-tar hai zara dekh kar chalo
daman jhulas na jaa.e chaman-zar men kahin
har phuul ik sharar hai zara dekh kar chalo
khilne lage hain phuul dil-e-zaḳhm-zaḳhm ke
manzil qarib-tar hai zara dekh kar chalo
Leave a Reply