marhala raat ka jab aa.ega
jism saa.e ko taras ja.ega
chal paḌi rasm jo kaj-fahmi ki
baat kya phir koi kar pa.ega
sach se katra.e agar log yahan
lafz mafhum se katra.ega
e’tibar us ka hamesha karna
vo to jhuTi bhi qasam kha.ega
tu na hogi to phir ai sham-e-firaq
kaun aa kar hamen bahala.ega
ham use yaad bahut a.enge
jab use bhi koi Thukra.ega
ka.enat us ki miri zaat men hai
mujh ko kho kar vo kise pa.ega
na rahe jab vo bhale din bhi ‘qatil’
ye zamana bhi guzar ja.ega
Leave a Reply