sham.a men soz ki vo ḳhu hai na parvane men
jo hai ai barq-shama.il tire divane men
lutf tha zikr-e-dil-soḳhta dohrane men
soz hai saaz kahan tuur ke afsane men
tha jo us chashm-e-fusun-saz ke paimane men
kaif vo DhunDiye ab kaun hai maiḳhane men
vasta dast-e-nigarin ka tujhe ai qatil
ek surḳhi ki kami hai mire afsane men
jo kabhi tha vahi hai aaj bhi afsana-e-ishq
ek do lafz badal jaate hain dohrane men
maut bhi munhasir in ki nigah-e-naz pe thi
ab nahin koi kami ishq ke afsane men
vahi shai jo abhi miina men thi ik mauj-e-nashat
vahi tufan-e-tarab ban ga.i paimane men
qaul vaa.iz ka baja shaiḳh ki talqin durust
dil-e-kafir kahin aa.e bhi to samjhane men
qaid-e-hasti ko samajhta hai junun ki tauhin
ab to kuchh hosh ke andaz hain divane men
shukr ban jaate hain aate hi zaban tak shikve
jaane kya baat hai us aankh ke sharmane men
kis tarah hazrat-e-va.iz ko ye samjha.un ‘rashid’
rind kya dekh liya karte hain paimane men
Leave a Reply