Sheen Kaaf Nizam
mauj-e-hava to ab ke ajab kaam kar ga.i
uḌte hue parindon ke par bhi katar ga.i
ankhen kahin dimagh kahin dast o pa kahin
raston ki bhiḌ-bhaḌ men duniya bikhar ga.i
kuchh log dhuup piite hain sahil pe leT kar
tufan tak agar kabhi is ki ḳhabar ga.i
nikle kabhi na ghar se magar is ke bavajud
apni tamam umr safar men guzar ga.i
dekha unhen to dekhne se ji nahin bhara
aur aankh hai ki kitne hi ḳhvabon se bhar ga.i
jaane hava ne kaan men chupke se kya kaha
kuchh to hai kyuun pahaḌ se naddi utar ga.i
suraj samajh saka na ise umr bhar ‘nizam’
tahrir ret par to hava chhoḌ kar ga.i
Leave a Reply