Galiyan Hain Bahut Si Abhi Diwar Ke Aage

galiyāñ haiñ bahut sī abhī dīvār ke aage

sansār mileñge tujhe sansār ke aage

ma.anī kī na.ī sharheñ thiiñ har baat meñ us kī

iqrār se pahle kabhī inkār ke aage

taqdīr jise kahte haiñ duniyā ke mufakkir

zardār ke pīchhe hai to nādār ke aage

in ko bhī samajhnā hai abhī sāhab-e-idrāk

hote haiñ haqā.eq bhī to aḳhbār ke aage

kyā izzat-e-sādāt zarā der na Thahrī

dastār bhī pāzeb kī jhankār ke aage

ab haath qalam hone haiñ kyā guzrī ho socho

jab baat ga.ī hogī ye me.amār ke aage

mahdūd hī hotī hai sadā satvat-e-shamshīr

laanā hai qalam ko tirī talvār ke aage

Leave a Comment