tauba ki nazishon pe sitam Dha ke pi gaya
”pi”! us ne jab kaha to main ghabra ke pi gaya
dil hi to hai uTha.e kahan tak gham-o-alam
main roz ke malal se ukta ke pi gaya
thiin laakh garche mahshar o marqad ki uljhanen
gutthi ko zabt-e-shauq ki suljha ke pi gaya
mai-ḳhana-e-bahar men muddat ka tishna-lab
saaqi ḳhata-muaf! ḳhata kha ke pi gaya
niyyat nahin ḳharab na aadi huun ai nadim!
”alam-e-rozgar se tang aa ke pi gaya”!
saaqi ke husn-e-dida-e-mai-gun ke samne
main jalva-e-bahisht ko Thukra ke pi gaya
uTTha jo abr dil ki umangen chamak uThin
lahra.in bijliyan to main lahra ke pi gaya
dil kuchh subut-e-hifz-e-shari.at na de saka
saaqi ke lutf-e-ḳhas pe itra ke pi gaya
Leave a Reply