Barkha-Rut

Akhtar Shirani

asman par chha raha hai abr-paron ka hujum!

nau-baharon ka hujum

aah ye rangin avara nazaron ka hujum

kohsaron ka hujum

badliyan hain ya kisi ke bhule-bisre khvab hain

be-khud o betab hain!

ya hava par tairta hai rud-baron ka hujum

absharon ka hujum

phirti hain avara matvali ghataen is tarah

aur havaen is tarah

jhumta phirta ho jaise mai-gusaron ka hujum

bada-khvaron ka hujum

vadi-e-ganga hai, barkha-rut hai, kaali raat hai

raat hai barsat hai

aur faza men tairne vaale nazaron ka hujum

nashsha-zaron ka hujum

nil-gun pariyan ufuq men par hain phailae hue

baal bikhrae hue

ya umand aaya hai savan ki baharon ka hujum

abr-paron ka hujum

nannhi nannhi bunden girti hain hijab-e-abr se

ya naqab-e-abr se

chhan raha hai qatre ban ban kar sitaron ka hujum

nur-paron ka hujum

ye ghataen hain ki khvabon ke safine hain ravan

be-qarine hain ravan

badbanon men chhupae chashma-saron ka hujum

ju-e-baron ka hujum

bijli hai ya nuur ki zanjir lahrai hui

pech-o-kham khaai hui

ya khamida marmarin phulon ke haron ka hujum

aur sitaron ka hujum

ye saman bijli ka ye mahtab ki si vadiyan

khvab ki si vadiyan

nashshe men bhiga hua ye sabza-zaron ka hujum

kohsaron men khushi ki bastiyan abad hain

mastiyan abad hain

char-su bikhra pada hai sabza-zaron ka hujum

margh-zaron ka hujum

yuun nazar aate hain kohsar-e-masuri duur se

mast se makhmur se

juun samundar se jaziron ki qataron ka hujum

sabza-zaron ka hujum

ye safar, ye raat, ye barsat aur phir ham-safar

al-aman o al-hazar

ek husn-e-yasmin rangin baharon ka hujum

mah-paron ka hujum

ye suhane manzar akhtar muddaton yaad aenge

muddaton tadpayenge

aah ye raat, uf ye mastana nazaron ka hujum

ye baharon ka hujum